ДУЬНЬЯ ГУРГЬАГУР 

Дилийрин девран я, дуьнья гургьагур.
Гьар са буба гачал хан я дуьньяда.
Инсанар хьайила хебни жанавур,
Дугъриди игридаз кван я дуьньяда.

Эй дили-дивана, межлисдиз тамаш:
Ких—агъсакъал хьанва, керекул—юзбаш.
Лачин —туьлек, тарлан хьайила яваш,
Тип1рез агъавал к1ан я дуьньяда.

Фагьум ая, стха, вунни хьухь уст1ар.
Нехирбанни чубан хьайила дустар:
Чанах, чанта санал вегьин я къастар.
Кьведни санал хьайла, чан я дуьньяда.

Вучда дустуникай дабан ат1удай,
Мез к1уьгьуь яз, рикI и серкед хьиз кудай?
Сада-садан рекье чпин чан гудай
Чун гьа Рабеъни Салман жен дуьньяда.
Етим Эмин, дуст акурла, жеда шад,
Гьич са ч1авуз вичин дустар такьаз яд.
Эвел-эхир пуч жеда вири са-сад,
Амукьдайди са т1вар-ван я дуьньяда.

----------------------------------------------------------------------

Заз булахдал яр акуна

Лгь, къе заз зи яр акуна булахдал,
Ca тегьер вич акъвазнавай дамахдал,
Женнет либас алук1навай бухахдал.
 Амукьна зун ч1угваз фикир, гуьзел яр.

Фикирна за: «Яраб ам зи яр я жал?»
Эгер дуьшуьш хьанайт1а са кас анал,
Жузачир за а касдивай ярдин гьал.
Гьуьруь ят1а, жейран ят1а гуьзел яр?

Кьилихъ галай яргъи сачах пекдин шал,
Пелен юкьвал аквазавай ч1улав хал.
Мецел вичин алай ширин, назик ч1ал.
Бедназар тахьуй ви жасад, гуьзел яр.

Эминаз мад хажалатар жеда жал?
Заз акурди ч1ехи кар я—ярдин т1ал.
Зи гьалдикай ярдиз хабар авач жал?
Зуьлейхадиз ухшар я вич, гуьзел яр.
---------------------------------------------------------------------

Туьквезбан  

Гьайиф тушни вун эцигиз чилерал?
Ширин вирт я, хуш нямет я, Туьквезбан.
Хаму кард хьиз, хвена к1анда гъилерал,
Вун жагъайдаз xynl девлет я, Туьквезбан.

Вун жагъайдаз гьич ви къадир чизавач,
Зар-зибада гьамиша вун хуьзавач.

Бес за гьик1да? Вун рик1елай физавач.
Зав гвайди ви гъам-хифет я, Туьквезбан.

Гимишдин пул дуьзмишна на яхада,
Ви ширин мез, шад билбил хьиз, рахада.
Агъузвалмир тай-туьшерин арада,
За ваз ийирди минет я, Туьквезбан.

Гьар пакамахъ экъеч1дай са рагъ я вун,
Гъилел кудай, нур гудай чирагъ я вун,
Гьар са ширин емиш авай багъ я вун.
Эминав гвайди ви дерт я, Туьквезбан,

----------------------------------------------------------------

Кьве паб . Етим Эмин

Гьич са касдиз кьве паб тахьуй дуьньядал,
ХьайитIа, адан кIвале агьузар жеди.
Виш агъзур йис хьайитIан ачух дуьньядал,
Гьар са чIавуз адан гуьгьуьл дар жеди.

Дишегьлидихъ жериди туш адалат.
Акьул гуз жеч, гьикьван хьайитIан гьавалат;
Рекьидалди алат тийир хажалат
Ви далудал кIеви мягькем ппар жеди.

Нагагь хьайитIа кьадар хьана  несибвал ,
Жеч адавай я кар-кIвалах, кесибвал;
Дигай кIвале жед къиямат, тагьсибвал
Ягъун, гатун ана авай кар жеди.

Нагагь хвейтIа сад садалай артухдиз,
Чай, шекер гуз, гьам зар-зиба алукIиз,
Рахач абур сад садивди ачухдиз,
Рахун-луькIуьн гьар патахъай къал жеди.

Етим Эмин, ви гуьгьуьл шад хьайитIа,
Къалмакъал жеч итимар къад хьайитIа.
Гьар уьлкведа дишегьли сад хьайитIа,
Алай чка яргъамаз хабар жеди.

-----------------------------------------------------------

СтIур Далагь

Дагълар

Зи гафар ваз лугьун за гьикI,
Далу хьайи масан дагълар?
За гьикI эхин, пад жезва рикI.
Дерт ала чал яман дагълар!

Агъзур-агъзур мунгъул къушун,
Атана чал, аман дагълар.
Жез амай кьван ккIана чун,
Пара авай душман, дагълар!

Квахьна фена хы-хыд къене,
Къудратлу тир чи ван, дагълар,
Такьат амач чахъ аквадай
Мунгъуларин дуван, дагълар!

Кьуьзуьд-аял пара кьена,
Чилерал гьахъ аман, дагълар!
Дуьньядин чин гьикI элкъвена?
Вучиз цIуьзвач кьакьан дагълар?

Вучиз къвазвач Алпандин цIай?
Ягъид кьилел я чан дагълар?
ТIалар-гъамар хьанва чаз пай,
ЧIана хьанва заман, дагълар!

Ваякьан я лезги хуьрер,
И тIал гьикIа эхин, дагълар?
Хьанавани дуьнья чIулав?
Дегишнани на чин дагълар?

СтIур Далагь гьахъ лезги я,
Гьахъ аламач чилел, дагълар!
Икьван дердер аквар кьван чаз,
Ацахь вун чи кьилел, дагълар!

------------------------------------------------------------

Эхир гаф

АцIанавай чи хуьруьн ким,
Атана фир дуьнья я им.
Зи гафаркай татуй квез хъел,
Чун алайд я вири рекьел.

Сува фена зи къар, варцар,
Зав рахана нуцIар, гъуцар.
Чилерин кьил чир хьанач заз,
Цавар вичин сир ганач заз.

Тапрукь менди алцурайд я,
Ракъин цIарар элкъуьрайд я.
Азиз урд я цIай-лапанд ван,
Вине къурд я Ватан жуван.

Чка тайла кьурд я яракь,
Мягькемвилиз хьайд я чан ракь.
КукIарайд я ягъи михьиз,
Къирмишайд я лап чIуьтер хьиз.

Акурд я заз канвай хуьрер,
АцIайд я зи видив вилер.
Гилани зи атIанвач агь,
Гьунарин ким гьинватIа лагь.

РакъурнатIан за уьмьур икI,
ВикIегьзама мазанан рикI.
Хайи хьантIан зи чандиз чил,
Сарахъ къведа зи эхир кьил.

Килиг куьне заз хтулар,
Япара тур чан штулар,
Зи руьгьдин муг хьайитIан цава,
Зи гьахъ рекьел куьн алама.

Куь рикIер гьич тахьуй пашман,
АкъатайтIан зи тандай чан.
Ял акIана кьейтIа Далагь,
Куь арадай фейтIа Далагь.